踏入7月,韓星輪住嚟香港,少女時代嘅孝淵就單拖襲港,出席代言嘅化妝品活動。活動上分享下化妝心得,佢話眼妝好緊要,港女們要偷師快啲mark低喇!
孝淵一向行型格路線,不過見到咁多fans,都不時以心心手勢回應,令舖頭外面嘅fans都高叫好可愛呀!有三十位幸運兒可以得到孝淵送出嘅禮物,睇吓呢幾個男孩子,抽中佢哋幾好開心,唔係因為有禮物,而係可以合照呀,個個都好想親近吓孝淵,不過保安森嚴,影完大相就被趕走喇!最幸運嘅一位就係佢,就可以同孝淵自拍,恨死其他fans呀!
孝淵之後接受訪問,就話對自己素顏好有信心,仲大讚少女時代嘅隊友,素顏個個都咁靚,尤其是係秀英呀!